Әдістемелік жұмыстар - №8 облыстық санаториялық мектеп-интернаты

"Үздік панорамалық сабақ - 2022"

admin8 — Wed, 30 Mar 2022 17:06:07 +0600

26 наурыз күні мектеп-интернатымызда педагогтардың кәсіби беделін көтеру, оларды қолдау және озық педагогикалық іс-тәжірибелерін насихаттау мақсатында "Үздік панорамалық сабақ - 2022" байқауы өткізілді. Байқауға әр бірлестік бойынша алты педагог қатысты. Байқаудың бірінші бөлімінде панорамалық сабақ көрсетіліп, екінші бөлімі эссе жазуға ұласты. Барлық қатысушылар оқытудың жаңа технологияларын ұтымды пайдаланып, шығармашылық іс-әрекеттерін көрсете білді. Байқау нәтижесінде әділ қазылар алқасының шешімімен "Үздік сабақ-2022" номинациясын тарих пәнінің мұғалімі Әбілғазиева Қазтай иеленді. Қалған қатысушы педагогтерімізге "Жаңашыл педагог", "Ізденімпаз педагог", "Шығармашыл педагог", "Ұшқыр ойлы педагог" номинациялары беріліп, дипломдармен және сыйлықтармен марапатталды.

"Сыйынар ем ана деген тәңірге..."

admin8 — Thu, 10 Mar 2022 12:12:30 +0600

Ардақты ана, аяулы ана, қымбаттым,

Тәтті ұйқыңды бөліп талай түн қаттың.

Өміріме нәрін берді ақ сүтің,

Кең құшағың - аясындай гүл бақтың.

Ана - тіршіліктің гүлі, отбасының берекесі.

Мектеп-интернатымызда 8 наурыз - Аналар мерекесіне орай "Сыйынар ем ана деген тәңірге..." тақырыбында мерекелік кеш болып өтті.

Мақсаты: Анаға деген сүйіспеншілік сезімін арттыру, ананы құрметтеуге, сыйлауға үйрету.

Кеште оқушылар ана құдіретін жырмен өрнектеп, жігіттер қауымы көңілді әзілдерден КВН қойып, би билеп, ән салып, ойындар ойнатып ұстаз аналар мен ару қыздарға мерекелік көңіл-күй сыйлады.

Біздің мақтанышымыз!

admin8 — Thu, 10 Mar 2022 12:07:47 +0600

Республикада топ жарған сыр елінің бүлдіршіндерінің қатарында біздің де мектеп-интернатымыздың оқушысы болғаны біз үшін үлкен мақтаныш.

"Дарын" республикалық ғылыми-практикалық орталығының ұйымдастыруымен 9-11 ақпан аралығында ''Балдәурен" республикалық оқу-сауықтыру орталығы базасында өткізілген "Зерде" конкурсында мектеп-интернатымыздың 6 сынып оқушысы Рустамұлы Нұрсұлтан 2 дәрежелі дипломмен марапатталды. Жүзден жүйрік, мыңнан тұлпар атанып, ғылыми жобада оза шапқан оқушымыздың жетекшісі тарих пәнінің мұғалімі Әбілғазиева Қазтай.

Жеңімпаздарымызды білім додасындағы жетістіктерімен шын жүректен құттықтаймыз.

"Талаптан да, білім мен өнер үйрен!"

admin8 — Thu, 10 Mar 2022 12:04:27 +0600

8 Облыстық арнайы санаториялық мектеп-интернатында 07-17 ақпан аралығында эстетикалық пәндер бірлестігінің "Талаптан да, білім мен өнер үйрен!"дәстүрлі онкүндігі болып өтті. Мақсаты: эстетикалық терең құндылықтары бар қазақтың ұлттық қасиеттерін бойына дарыта отырып, оқушыларға қазақ өнерінің озық үлгілерін заманауи түрде үйрете отырып, өнерлі, білімді, мәдениетті, салауатты ұрпақты тәрбиелеу.

Онкүндік салтанатты ашылуымен бастау алып, пән мұғалімдерінің ашық сабақтары мен сыныптан тыс жұмыстары, тартысты жарыстар мен қызықты сайыстарға жалғасты.

Биылғы балалар жылына орай онкүндіктің жабылуы сыр өңіріне белгілі эстрада әншілерінің концерттік бағдарламасымен және белсене қатысқан оқушыларды марапаттаумен аяқталды.

https://www.facebook.com/100041684740405/videos/pcb.821828892549928/1134319023986463

"Алғыс айту күнімен"

admin8 — Thu, 10 Mar 2022 12:01:26 +0600

Құрметті әріптестер, ата-аналар, оқушылар!

Жер әлемді жылылыққа бөлеп, мейірлендіретін шұғылалы көктемнің алғашқы мерекесі - "Алғыс айту күнімен" шын жүректен құттықтаймыз.

Алғыс алу - адамның жанын жадыратады. Алғыс естіген сайын жақсы іс тындырып, қуанышымыз еселене түседі, солай емес пе?

Олай болса, мереке қарсаңында оқушылармен жасалған іс-шарамызды назарларыңызға ұсынамыз.

"Оқуға қайда барамыз?"

admin8 — Thu, 10 Mar 2022 11:57:36 +0600

4 наурыз күні мектеп- интернатымызда оқушыларымызға кәсіптік бағыт- бағдар беру, таңдау мүмкіндіктерін шешу мақсатында

"Оқуға қайда барамыз?" тақырыбында колледж мамандарымен кездесу болып өтті. Кездесуге Қызылорда құрылыс және бизнес колледжінің пән оқытушысы Тобжанова Бибіжан, осы колледж маманы Рысмамбетова Гүлнұр және бірінші курстың озат студенті Мақсұт Лаура, сонымен бірге Қызылорда қызмет көрсету және сервис колледжінің өндірістік оқу шебері Джаркимбаева Зинат қатысып, мамандықты таңдауда қазіргі еңбек нарығына сұранысқа ие мамандықтар туралы тұшымды ақпараттар беріп, оқушыларымыздың мамандық таңдауына ақыл кеңестерін беріп, сұрақтарына жауап берді.

Біз де өз түлектерімізге мамандық таңдауда сәттілік тілейміз.

Әдістемелік жұмыстар

admin8 — Mon, 25 Oct 2021 17:51:33 +0600

«Білімді ұрпақ-жарқын болашақ» бастауыш сыныптар пән бірлестігінің онкүндігі

2021 оқу жылының 11-22 қазан аралығында мектебімізде «Білімді ұрпақ -жарқын болашақ» тақырыбында бастауыш сыныптар пән бірлестігінің онкүндігі өткізілді.

Онкүндіктің мақсаты: оқушыларымыздың бойындағы адамгершілік қасиеттерін дамыта отырып,оқу процесін ұйымдастырудың заманға сай үлгілерін қалыптастыру, елеулі оқиғаларды арқау ете отырып,оқушылардың танымдық көзқарасын, ой-өрісін, дүниетанымын кеңейту, логикалық ойлау, шапшаңдық, ізденімпаздық, іскерлік қасиеттерін қалыптастыру, өз пікірін еркін айта білуге, оқуға деген қызығушылығын оятып, ынтасын арттыру.

Оқу үдерісін жетілдіру мен қатар баланың шығармашылық, жас және жеке ерекшеліктерін ескере отырып, рухани-адамгершілік қасиетінің қалыптасуын қамтамасыз ету қажет. Сол себепті де бастауыш сынып бірлестігінің онкүндік жоспарын құру барысында мына міндеттер басшылыққа алынды:

- Оқушының оқуға деген оң мотивациясын қалыптастыру;

Ашық сабақ және сыныптан тыс іс-шараларды қызықты әрі пайдалы өткізу
Формативті бағалауды тиімді қолдана отырып, барлық оқушыны оқу және тәрбие үдерісіне тарту.

Онкүндік жоспары адамгершілік құндылықтарды негізге ала отырып құрылды:

1.Апталықтың ашылуы.Мектеп фойесінде бастауыш сыныптар бірлестігінің жетекшісі Әбилдаева Ардақ оқушыларды онкүндік жоспарымен таныстырып өтті. Сонымен бірге оқушыларға «Өзің оқысаң,өзгеге табыс ет!» кітап оқу жобасы аясында көріністер көрсетіліп, тақпақтар орындалып,өткізілетін шараларға белсене қатысуға шақырды.

2.Ашық сабақтар.Онкүндік барысында барлық сыныптарда түрлі пәндер бойынша ашық сабақтар ұйымдастырылды.

Сабақтардың мақсаты жүйелі құрылып, оқушылардың қабылдау мүмкіндігіне қарай тапсырмалар қызықты ұйымдастырылып отырды. Пән мұғалімдері ашық сабақтарында жаңа инновациялық технологиялардың әдіс –тәсілдерін тиімділігіне қарай, бағалаудың ерекше жаңа әдістерін өз сыныбының жас ерекшелігіне қарай ұтымды пайдалана білді.

3. Сыныптан тыс сағаттар.

Оқушылардың шығармашылығын шыңдап, ой-өрісін кеңейту мақсатында жүргізілген сыныптан тыс жұмыстар жоғары дәрежеде өтті .Тәуелсіздігіміздің 30 жылдығына орай

2 «Ә» сыныбы оқушыларының сынып жетекшісі Маханбетова Қарлығаш біліммен шашқан шашуы «Ойнайық та,ойлайық» интеллектуалдық сайысы , 2-4 сыныптар арасында Әбилдаева Ардақтың «Вооkсгоssing» кітап оқуға құштарлық оқушылар шығармашылығы, 3 «А» сыныбымен ұйымдастырған Еркінбекова Ғазизаның «Ұлы дала тарландары» тақырыбындағы іс-шаралары жоғары дәрежеде өткізілді.

4. Коучинг «Мен таңдаған мамандық» тақырыбында ардагер ұстаз Байменова Қарлыға апайдың ұйымдастырумен өткізілді. Барлық бірлестік мүшелері қатысып, ұстаздың осы мамандық жолында 35 жыл жұмыс жасап, мәртебелі мамандықтың қиындығы мен қызығын ортаға салды.

5.Апталықтың жабылуы. Онкүндік барысында атқарылған жұмыстар қорытындыланып, белсене қатысқан оқушылар марапатталды.

Қорғанова Хадиша 9 «Ә» сынып оқушысы Жармағанбетова Гүлім Тақырыбы: «Еңсесі биік Ұлы Жеңіс»

admin8 — Fri, 17 Apr 2015 09:09:12 +0600

Қызылорда қаласы «№8 облыстық арнайы санаториялық мектеп-интернаты» коммуналдық мемлекеттік мекемесінің қазақ тілі мен әдебиеті пәні мұғалімі Қорғанова Хадиша 9 «Ә» сынып оқушысы Жармағанбетова Гүлім Тақырыбы: «Еңсесі биік Ұлы Жеңіс»

Қызылорда қаласы «№8 облыстық арнайы санаториялық мектеп-интернаты» коммуналдық мемлекеттік мекемесінің қазақ тілі мен әдебиеті пәні мұғалімі Қорғанова Хадиша

9 «Ә» сынып оқушысы Жармағанбетова Гүлім

Тақырыбы: «Еңсесі биік Ұлы Жеңіс»

Тәрбие сағатының мақсаты: Ұлы Отан соғысы, оның зардаптары, Ұлы Жеңіс туралы мағұлмат беру. Отан үшін жан қиған аталар мен апалардың, соғыстан оралған, қазіргі кезде арамызда жүрген ардагерлеріміздің ерлігін үлгі ете отырып, оларды құрметтеуге тәрбиелеу.

Мұғалім: Армысыздар, құрметті қонақтар, оқушылар, мұғалімдер! Әрқайсымыз үшін жақын әрі қымбат мереке Жеңіс күні де келіп жетті. Жеңіске жету жолында қазақстандықтардың асқан ерлігі мен әскери жанқиярлығы Отан соғысы тарихындағы жарқын беттерге айналды. Сондықтан бұл күннің маңызы өте жоғары. Жеңіс үшін шыбын жандарын құрбан еткен бірнеше миллиондаған адамдардың есімдерін есте сақтап, 1418 азапты күн мен түнді болашақ үшін ерен еңбекпен, қайсар ерлікпен өткізгендерін ұмытуға болмайды. Ендеше, бүгінгі «Ер есімі – ел есінде» аталатын ашық тәрбие сағатымыз Жеңіске, Жеңіс себепкерлеріне арналады.

«Батыр бала Болатбек» әні орындалады.

1-оқушы: Төрт жыл бойғы қанды қырғыннан кейін, қырық бестің көктемінде дүние жүзі халқы бостандық алды. Халық Отан ұғымын терең сезіне түсті. Ерлік пен еңбек жеңіп шықты. «Ешкім де ұмытылмайды, ештеңе де ұмыт қалған жоқ». Осынау сөздер Жеңіс күнін мерекелеу кезінде жиі айтылады. Осынау сөздер соғыстан қаза тапқандар ескерткішіне де қашалып жазылған.

2-оқушы:

Жеңіс деген жақсылықтың сыңары,

Жігер менен құштарлықтың құралы.

Күрескердің арманы мен ұраны,

Қуаныш пен мерекенің бұлағы.

3-оқушы:

Қазақ арасында осы соғыста ерекше қаһармандық танытқан батырдың бірі әрі бірегейі – Бауыржан Момышұлы.Соғыс кезінде қолбасшы Рокоссовский лейтенант шеніндегі жап-жас қазақ жігітінің қабілетіне риза болып, полк командирлігіне тағайындаған. Б.Момышұлы соғыс кезінде 207 рет шайқасқа қатысып, 2 рет ауыр жараланды. Басшалық тарапынан бірнеше рет Кеңес Одағы батыры атағына ұсынылады. Бірақ, атақ кешіктіріле береді. Еңбекқор Б.Момышұлы мойыған жоқ. Ол 37 дәптер күнделік жазған батыр, бейбіт өмірдің қаруы қаламды алып қазақ және орыс тілдерінде көптеген кітаптар жазады. «Артымызда Москва» кітабы Кубаның бүкіл әлемге белгілі басшысы Фидель Кастроның сүйіп оқитын кітабына айналды. Бауыржан Момышұлының Ұлы Отан соғысында ұрыс жүргізу әдістері үлгі ретінде қабылданып, Кубаның әскери академиясында оқытылды.

4-оқушы: 9 мамыр – Жеңіс күні өмірді сүйер адамзаттың есінен мәңгі кете ме? Бірақ бұл Жеңіс оңайлықпен келген жоқ. Гитлершілдер соғыстың бас кезінде 190 дивизияны, 5 мыңдай ұшақты, 3700 танкті, 50 мыңдай қаруды шабуылға шығарды. Жерімізге басып кірген жау әскерінің жалпы саны 5,5 миллион адамға жетті.

5-оқушы: Қазақстандықтар Брест қамалын қорғады, Мәскеу түбінде де өлімге бастарын тікті. Сталинград, Курск доғасындағы шайқастарда ерекше көзге түсті. Берлинге шабуыл жасады, Рейхстагқа қазақ жігіті Рақымжан Қошқарбаев Жеңіс туын 1945 жылдың 30 сәуірде тікті.

6-оқушы: Біздің халқымыз қазақтың батыр қыздары Әлия Молдағұлова мен Мәншүк Мәметованың есімдерін мақтанышпен атайды.

Ата-анасынан ерте айрылған Мәншүк жастық шағын да тәрк етті. Алматы медициналық институтында оқып жүрген шағында жау жақтан ескен соғыстың ызғарлы желі жас қайыңның жапырағындай жайқалған бойжеткенді жұлып түсіреді. Халқына төніп тұрған қауіпке жаны шыдамай, дамыл таппастан әскерге өзі сұранып, жоғарыға мынадай өтініш жазады: «Фашистерді жою үшін майданға жіберетін менің ағайым да, апайым да жоқ, сондықтан өзімді жіберіңіз». Ел үшін қан төгіп, жан беріп жатқан отандастарына қалай да өз жәрдемін бергісі келген ниетпен, 1942 жылдың тамыз айында «Қызыл армия» қатарына алынды.

1943 жылдың 15 қазанында Псков облысындағы Невель қаласын босату үшін Изоча станциясындағы 173,7 биіктігінде қантөгіс соғыс болды. Сол күні Мәншүк жан серігі — пулеметімен дамылсыз оқ атып, ерен ерлік көрсетті. Жауыз жаудың Мәншүкке қарсы атқан оғы оның ажал оғы болып, өрімдей қызды қыршыннан қиып түсті.

7-оқушы: 1942 жылы Әлия өз еркімен майданға аттанып, мергендер мектебін үздік бітірді. Бірақ біраз уақытқа дейін оның алғы шептегі атыс-шабыс алаңында білім-білігін іс жүзінде көрсетуіне рұқсат етпеді. Бірақ жас қазақ қызы алға ұмтылды, жауға қарсы оқ жаудыруға асықты. Бір хатында ол өз құрбылары мен достары үшін фашистерден кек алуды қалайтынын жазады. Өзі оқыған қаласының құрсауда қалғаны оны қатты алаңдататын еді.

1943 жылы Снайперлер дайындау орталық әйелдер мектебін аяқтайды. 1943 жылдан бастап, 54-ші арнайы атқыштар бригадасы 4-батальонының снайпері болған (22-ші әскер, 2-ші Балтық жағалауы фронты). Жау әскерінің 30-дан аса сарбазы мен офицерінің көзін жойған. 1944 жылы 14 қаңтарда Псков облысының солтүстігіндегі Новосокольники ауданында қаза тапты.

Әлия мен Мәншүк туралы ән орындалады.

Әлия туралы бейнематериал көрсетіледі:

8-оқушы: Оны – «дала сермеңдесі», «көк тәңірісі», «аспан перісі», «қанаттылар ханы» деп құрмет тұтты. Дәл осындай текті құстың болмысы қазақтың арда ұлы, Кеңес одағының батыры атағын екі рет алған қыран текті Талғат Бигелдинов еді.

Дүниежүзілік екінші соғыстың ажал қорғасындары аспан көгін осқылап жатқан тұста, қазақтың сайын даласынан, Қараөткелден түлеп ұшқан сарша қыран көкке темір тегеурінді әскери ұшақты 305 рет көтерген екен.

9-оқушы: Қабиденұлы Төлеген Тоқтаров – қатардағы жауынгер. 1942 жылдан бастап 1943 жылға дейін Сталинград майданында соғысқан. «Германияны жеңгені үшін» медалімен марапатталған.

10-оқушы: Ұлы Отан соғысының ержүрек батыры, халқымыздың біртуар перзенті – Қасым Қайсенов 1918 жылы 23 сәуірде Шығыс Қазақстан облысының Ұлан ауданында дүниеге келген.1941 жылдың қараша айында Оңтүстік-Батыс майданның штабына аттандырылып, басқыншылар қолында қалған Украина жерін азат ету үшін жау тылына түсіріледі. Қайсенов атамыз сол жерде Чапаев атындағы партизан құрамасының үшінші отрядының басқарушысы болады. Бұдан кейін, 1944 жылдың соңына дейін Чехославакия (қазіргі Чехия), Румыния, Молдавия елдеріндегі партизан қозғалыстарына қатысты. Соғыс аяқталған жылдардан соң бейбіт еңбекке араласып, Қазақстан Жазушылар одағында, баспа мекемелерінде қызмет атқарған. Ұлы Отан соғысының қиын-қыстау кезеңін, жауынгерлердің ерлігін суреттейтін «Жас партизандар» (1954), «Ажал аузында» (1959), «Жау тылындағы бала» (1961), «Жау тылында» (1973) секілді көптеген шығармалардың авторы.

«Әрқашан күн сөнбесін» әні үш тілде орындалады.

11-оқушы: Соғыс жылдарында айырықша көзге түскен ақындардың бірі – Нұрсұлтан Жұбатұлы. Ауылда мұғалім болып істейтін сауатты кісі болған. Оның майдан даласынан оралмай қалған батырдың бірі Ү.Түктібаевтың анасы Наурызбикеге арнап жазған «Майданнан хат» және анасының атынан жауынгер ұлына арнап жазған «Майданға хат» атты толғаулары осы күнге дейін ел есінде. Енді осы толғауларды тыңдап көрейік. Оқушы домбырамен орындайды:

«Майданнан хат» (үзінді):
Хат жазамын майданнан,
Мейірімшіл ғазиз-анама
«Жақыным-жарым» дегенмен,
Анаңдай жақын бола ма?
Көңілінде тілек, көзде жас,
Екі қолың жағаңда.
Қасірет шегіп, қан жұтып,
Сарғайдың ба санаға?
Сағынған соң мен ойлап,
жүрегің оттай жана ма?
Ет бауырың елжіреп,
Қайғыра берме балаңа.
Сабырдың суын бере көр,
Жаныңдаға жараңа.
Ажалсыз адам өлмейді.
Мезгілсіз шөлмек сына ма?
Ердің басы ел үшін,
Арыма жаным садаға.
Бұлт жамылып қар төсеп,
Мен жатырмын далада.

«Майданға хат» (үзінді):
Құлыншағым аман ба?
Қолыма тиді сенен хат.
Хабарыңды есітіп,
Қуанып қалды ғаламат.
Күніге тоқсан тілеймін,
Құлыным кел деп саламат.
Жүрегім – жалын, ішім у,
Жанымда ауыр жарақат.
Суретің келді хатыңда,
Шекпен киген жалаңқат.
Ерге лайық бес қару,
Асыныпсың автомат.
Суретіңе қарасам,
Емшегім иіп, сүт тамад.
Көзімнің жасы төгіліп,
Ұйқыдан кетті рахат.
Отаның үшін қарағым,
Арың қымбат жаныңнан.
Бөбектерің аман-сау,
Ас жейді әзір қолымнан.
Ербеңдеген ермегім,
Тастамаймын қолымнан.
Лақ-қозы қайырсам,
Қалмайды сүйем соңымнан.
Жағдайсыз емес келінім,
Оны да көрем бағымнан.
Қайырмайды тілімді,
Жібектей майда жамылған.
Көңілімде алаң жоқ,
Жаны сүйген жарынан.
Уһілеп кейде демалып,
Шығады түтін жалыннан.
Хабарыңды жиі жаз.
Өтпесін көп күн арадан.
Талқандап жауды аман қайт,
Бұлт серпіліп көгімде.
Жазылсын жүрек жарадан!
«Қариялар азайып бара жатыр» әні орындалады.
2-Жүргізуші:
Елге қауіп төнбесін,
Егестен адам өлмесін!
Есен – аман болайық,
Енді соғыс болмасын!
Өртенбесін туған ел!
Шайқалмасын асқар бел!
Шайқалмасын шалқар көл!
1-Жүргізуші:
Жасасын Жеңіс!
Бақытты елім күле бер!
Тәуелсіз болып болашағына жүре бер!
Болмасын соғыс!
Болмасын соғыс!
Болмасын!
Осы тілекпен барша халайық түрегел!
Ж. Нәжімеденовтың «Бейбіт күн тілегі» әні қорымен орындалады:
Жойылсын жалғыз сөз соғыс деген,
Оқ даусы мәңгілік жойылсын.
Бомбаның орнын тегістеген,
Күректер музейге қойылсын.
Қайырмасы:
Кел, достарым, ән бастадым.
Көтеріп жаңғырық!
Данасын дала, баласын ана,
Жоқтамасын мәңгілік!
Көктесін жас ағаш одан әрі,
Өткен күн қайтадан жанбайды.
Сұлудың кестелі орамалы,
Сүртсін, тек тершіген маңдайды.
Қайырмасы:
Қайғыны білмесін ана жаны,
Қазіргі адамда арман сол.
Әлемнің бар сәби балалары,
Оянсын ұйқысы қанған соң.
Қайырмасы.