№8 облыстық санаториялық мектеп-интернаты

Бос тұрған тәрбиешінің көмекшісі лауазымына конкурс өткізу туралы хабарландыру

admin8 — Thu, 03 Sep 2026 10:31:02 +0600

«Қызылорда облысының білім басқармасының «№ 8 облыстық санаториялық мектеп-интернаты» коммуналдық мемлекеттiк мекемесi, Қызылорда облысы, Қызылорда қаласы, индексі 120008, Ғ. Мұратбаев көшесі,44, электрондық мекен-жайы: 8-internat@mektebi.kz, бос тұрған тәрбиешінің көмекшісі лауазымына орналасу үшін конкурс жарияланғандығы туралы хабарлайды.

Тәрбиешінің көмекшісінің негізгі функционалдық міндеті:

Тәрбиеленушілердің тіршілік іс-әрекеттерін ұйымдастыруға қатысады, білім беру мекемесіне келген уақыттан бастап оларға күтім жасайды (киінуге, шешінуге, жууынуға, тамақтануға, төсекке жатқызуда көмек көрсетеді, емдік-профилактикалық іс-шараларға бірге барады, тәрбиешінің жетекшілігімен балаларды қыдыртады).

еңбек ақы көлемі 140 000 теңгеден бастап;

- жұмыс уақыты 07.30-дан 16.30-ге дейін.

2. Біліктілік талаптарына сәйкес конкурсқа қатысушыға қойылатын негізгі талаптар:

жұмыс өтіліне талап қойылмайтын техникалық және кәсіптік (арнайы орта, кәсіби орта) білімі немесе жалпы орта білімінің болуы.

3. Конкурсқа қатысуға құжаттарды қабылдаудың соңғы мерзімі 2026 жылғы қыркүйек айының 16 күнгі сағат 18.00-ге дейін.

4. Конкурсқа қатысуға ниет білдірген адам хабарландыруда көрсетілген құжаттарды қабылдайтын мерзімде ұйымға қолма-қол немесе пошта арқылы мынадай құжаттарды:

1) қоса берілетін құжаттардың тізбесі көрсетілген конкурсқа қатысу туралы өтінішті;

2) жеке басын куәландыратын құжаттың көшірмесін;

3) кадрларды есепке алу жөніндегі толтырылған жеке парақты (нақты тұратын мекенжайы мен байланыс телефондары көрсетілген);

4) лауазымға қойылатын біліктілік талаптарына сәйкес білімі туралы құжаттардың көшірмелерін;

5) еңбек қызметін растайтын құжаттың көшірмесін;

6) "Денсаулық сақтау саласындағы есепке алу құжаттамасының нысандарын бекіту туралы " Қазақстан Республикасы Денсаулық сақтау министрі міндетін атқарушысының 2020 жылғы 30 қазандағы № ҚР ДСМ-175/2020 бұйрығымен (Нормативтік құқықтық актілерді мемлекеттік тіркеу тізілімінде № 21579 болып тіркелген) бекітілген нысан бойынша денсаулық жағдайы туралы анықтаманы;

7) сыбайлас жемқорлық қылмыс жасағаны туралы мәліметтердің бар не жоқ екендігі туралы анықтаманы;

8) болған жағдайда оның біліміне, жұмыс тәжірибесіне, кәсіби деңгейіне қатысты қосымша ақпаратты (біліктілігін арттыру, ғылыми дәреже мен атақ беру, ғылыми жарияланымдар туралы құжаттардың көшірмелері, алдыңғы жұмыс орнындағы басшылық берген ұсынымдарды) ұсынады.

5. Әңгімелесу Қызылорда қаласы, Ғ.Мұратбаев көшесі 44 үйде өткізіледі.

📚 1 - ҚЫРКҮЙЕК — БІЛІМ КҮНІ ✨

admin8 — Tue, 01 Sep 2026 10:32:47 +0600

1 - ҚЫРКҮЙЕК — БІЛІМ КҮНІ

1 қыркүйек - білім әлеміне алғаш қадам басқан оқушылар үшін ерекше күн. Осы айтулы мерекеге орай №8 облыстық

санаториялық мектеп-интернатында 1-сынып оқушыларына арналған "Қазақстан Республикасының Конституциясы: Адал азамат, зерделі ұлт және жауапты қоғам қалыптастырудың негізі" тақырыбында салтанатты іс-шара ұйымдастырылды.

Салтанатты іс-шарада мектеп-интернат директоры Толеуов Берикбол Оразгелдіұлы, мектеп-интернаттың ардагер ұстазы Жусенова Рыскүл Әмірбекқызы және ата-ана Апсадыкова Зейне Касымхановна сөз алып, барша ұстаздар қауымын, ата-аналар мен оқушыларды жаңа оқу жылының басталуымен құттықтап, оқушыларға ақ жол, сәттілік пен жарқын болашақ тілеп, ізгі тілектерін білдірді.

Іс-шара барысында оқушылар өз өнерлерін көрсетіп, алғашқы қоңырауын соқты.

Сонымен қатар әр сыныпта біріңғай сынып сағаты өтті. Сынып сағатында оқушылар Қазақстан Республикасының Конституциясына арналған көрнекіліктермен танысып, өздерінің құқықтары мен міндеттері туралы мағлұмат алып, өз ойларын ортаға салды.

Конституция – еліміздің тұрақтылығы мен тәуелсіздігінің, азаматтардың ұюю мен бостандықтарының берік кепілі.

Жас ұрпақтың бойына отансүйгіштік, азаматтық жауапкершілік және заңға құрмет сезімін қалыптастыру – баршамызға ортақ міндет!

Білім күні құтты болсын! Жаңа оқу жылы табысты, білімге толы болсын!

🔔"Соңғы қоңырау"🔔

admin8 — Tue, 26 May 2026 10:57:23 +0600

25 мамыр 2026 жылы №8 облыстық санаториялық мектеп-интернатында білім жолындағы белестердің бірі "Соңғы қоңырау" мерекесіне орай "Сәт сапар саған, жас түлек!" атты салтанатты жиын өтті.

Салтанатты жиын еліміздің Әнұранымен ашылды. Мектеп-интернат директоры Толеуов Берікбол Оразгелдіұлы, мектеп- интернат директорының оқу ісі жөніндегі орынбасары Дүйсенбаева Гүлфарида Сейткамалқызы және ұстаз ардагерлері оқушыларды, ата-аналарды, ұстаздарды оқу жылының аяқталуымен құттықтап, жылы лебіздерін білдірді.

Соңғы қоңыраудың соғылуы - балалық шақпен қоштасып, үлкен өмірге қадам басудың белгісі. Көпшілігің болашаққа жоспар құрып, асыл мақсаттарыңызды айқындап та қойған боларсыздар. Сол биік мұраттарға жетулеріңізге тілектеспін. Өмір жолдарыңыз ашық болып, бастаған істеріңізге сәттілік серік болсын! - деді өз құттықтауында мектеп-интернат директоры.

2025-2026 оқу жылында жыл бойы еңбектеніп, үздік оқығаны үшін оқушыларға мадақтама қағаздары табысталды.

Түлектер ұстаздарына жүрекжарды өлеңдерін арнап, әсем әндерін жолдаса, түлектердің ата-аналары мектеп басшылығы мен ұстаздарға ризашылығын білдіріп, ақ тілегін арнады.

Жиын қоңырау соғу рәсімімен және түлектердің вальсімен қорытындыланды.

https://www.facebook.com/share/v/1B9EevtPA7/

"Адал еңбек - адал табыс"

admin8 — Tue, 05 May 2026 10:33:32 +0600

№8 облыстық санаториялық мектеп- интернатында бастауыш тәрбиешілер бірлестігінің "Адал еңбек - адал табыс" атты онкүндігі аясында тәрбиешілер Л.Мырзымова мен А.Сәрсенбаеваның ұйымдастыруымен "Мектеп театры" жобасы бойынша 1-сынып оқушыларының қатысуымен "Еңбек - бәрін жеңбек" атты тәрбие сағаты өткізілді.

Тәрбие сағаты барысында оқушылар барлық жетістікке еңбек арқылы жетуге болатынын, еңбек еткен адам биікке жете алатынын көріністер арқылы көрсетіп, ән айтып, би биледі. Сонымен қатар болашақта ел ағаларындай сахна төрінен көрініп, "Алтын домбыраны" қанжығаға байлаймыз деген арманын білдірген оқушылар домбыраны қолға алып, бір-бірімен айтысып, көрермендерге ерекше көңіл-күй сыйлады.

Мақсаты: Оқушыларды еңбексүйгіштікке тәрбиелеу, еңбек арқылы жетістікке жетуге болатынын ұғындыру, ұлттық өнер мен құндылықтарға қызығушылығын арттыру.

"Адал еңбек - адал табыс"

admin8 — Tue, 05 May 2026 10:32:05 +0600

№8 облыстық санаториялық мектеп- интернатында бастауыш тәрбиешілер бірлестігінің "Адал еңбек - адал табыс" атты онкүндігі аясында тәрбиешілер Г.Тулегенова, Ж.Сақтағанованың ұйымдастыруымен 2-сынып оқушыларының қатысуымен

"Еңбек ет те мақтан, ойнап күл де шаттан" атты тәрбие сағаты өткізілді.

Тәрбие сағаты барысында оқушылар еңбек туралы көріністер қойып, ән шырқап, би билеп, көрермендердің көңіл-күйін көтеріп, еңбек адамдарына деген көзқарастарын кеңейтті.

Мақсаты: Оқушыларға еңбектің қадірін ұғындыру, еңбек адамдарына сыйластықпен қарауға және адалдыққа тәрбиелеу.

"Мектеп театры"

admin8 — Mon, 27 Apr 2026 09:54:24 +0600

№8 облыстық санаториялық мектеп- интернатында бастауыш тәрбиешілері бірлестігінің "Адал еңбек - адал табыс" атты онкүндігі аясында тәрбиешілер М.Омарова мен Т.Маханованың ұйымдастыруымен "Мектеп театры" жобасы бойынша 4-сынып оқушылары "Әжемнің ертегісі: Еңбек - бақыт бастауы" атты ертегі желісі бойынша сахналық қойылым қойды.

Оқушылар қойылым барысында өз рөлдерін жоғары деңгейде орындап, еңбекқорлық пен адалдықтың маңызын көрермендерге әсерлі жеткізе білді.

"Еңбек - бақыт бастауы" - тәрбиелік мәні бар ертегі. Онда еңбекқор және жалқау адамдардың айырмашылығы көрсетіледі. Еңбекқор адам өз еңбегімен жетістікке жетсе, жалқау адам еш нәтижеге қол жеткізе алмайды.

Мақсаты: Оқушылардың еңбекке деген құрметін арттыру, адал еңбектің қадірін түсіндіру.

👨‍🌾 "Адал еңбек - адал табыс" атты онкүндігінің ашылу салтанаты өткізілді.

admin8 — Mon, 27 Apr 2026 09:45:32 +0600

№8 облыстық санаториялық мектеп- интернатында 20-30 сәуір күндері аралығында өтетін бастауыш тәрбиешілері бірлестігінің "Адал еңбек - адал табыс" атты онкүндігінің ашылу салтанаты өткізілді.

Ашылу салтанатында интернат меңгерушісі Ж.Орынбасарова онкүндіктің маңыздылығына тоқталып, жоспарымен таныстырды. Директордың оқу ісі жөніндегі орынбасары Г.Дүйсенбаева сөз алып, оқушыларға адал еңбектің қадірін түсіндіріп, білімге деген құштарлықты арттыру басты міндет екенін атап өтті.

Оқушылар мектеп ауласында өз өнерлерін көрсетіп, педагог-психолог Б.Акмурзаева және ұстаздар мен тәрбиеші апайларымен біргегүл егіп, суарып, еңбектің қадірін түсініп, табиғатты аялау мен қорғаудың маңызын терең ұғынды.

Бірлескен еңбек - ұйымшылдықтың, жауапкершіліктің және еңбекқорлықтың жарқын көрінісі.

Мақсаты: Оқушыларды адал еңбекке баулу, еңбекқорлық пен жауапкершілікке тәрбиелеу.

📚 23 сәуір – Ұлттық кітап және кітапханашылар күні құтты болсын!✨

admin8 — Thu, 23 Apr 2026 09:51:55 +0600

23 сәуір – Ұлттық кітап және кітапханашылар күні құтты болсын!

Кітап – тарихтың шежіресі, білімнің алтын қазынасы. Ал кітапхана – сол баға жетпес байлықтың киелі шаңырағы. Осы игілікті істің басында жүрген, оқырман мен кітап арасында алтын көпір болып жүрген кітапханашылардың еңбегі ерен.

Мерекеге орай барша кітапхана саласының қызметкерлері мен оқырман қауымды құттықтаймыз! Отбасыларыңызға амандық, жұмыстарыңызға шығармашылық табыс тілейміз. Рухани қазынамыз молая берсін!

Ізгі ниетпен, №8 облыстық санаториялық мектеп-интернат ұжымы.

🏆 ҚҰТТЫҚТАЙМЫЗ! 🏆

admin8 — Sat, 18 Apr 2026 09:46:48 +0600

ҚҰТТЫҚТАЙМЫЗ!

2026 жылдың 16 сәуірінде

"Дарын" ҒПО ұйымдастырған "Ұлы өнертапқыштыққа алғашқы қадам" инновациялық идеялар байқауының облыстық кезеңінде №8 облыстық санаториялық мектеп-интернат оқушылары үздік нәтиже көрсетті.

Құрылыс және смарт инфрақұрылымдар саласындағы техникалық құрастыру номинациясы бойынша ІІІ дәрежелі диплом иегері - 7-сынып оқушысы Төлеген Мансура

Робототехника және автоматтандырылған жүйелер номинациясы бойынша ІІІ дәрежелі диплом иегері - 8-сынып оқушысы Серік Нұрәли

Жетекшісі: Бейісов Сұлтанбек Оразбекұлы

Оқушыларымыз бен жетекшісін шын жүректен құттықтай отырып, шығармашылық табыс, жаңа жетістіктер мен биік белестер тілейміз!

Білім мен ғылым жолындағы ізденістеріңіз әрдайым жемісті болсын!

🎓"Болашаққа бағдар: дұрыс мамандық таңдау"

admin8 — Fri, 17 Apr 2026 10:59:45 +0600

№8 облыстық санаториялық мектеп- интернатында "Болашаққа бағдар: дұрыс мамандық таңдау" тақырыбында маман иелері 9-сынып бітіруші түлектерге арналған маңызды кездесу өткізді.

Кездесуге И.Әбдікәрімов атындағы Қызылорда политехникалық жоғары колледжінің маманы Нұрейісова Әлия Алиакбарқызы, М.Ықсанов атындағы Қызылорда техникалық-IT жоғары колледжінің оқытушысы Кулекеев Бекзат Кашкинбаевич, С.Ысқақов атындағы Қызылорда құрылыс және бизнес колледжінің маманы Оргараева Майра Алыбаевна қатысып, оқушыларға қазіргі таңда сұранысқа ие мамандықтар туралы кеңінен ақпарат беріп, әр мамандықтың ерекшеліктері мен мүмкіндіктерін түсіндірді. Сонымен қатар, дұрыс мамандық таңдаудың маңыздылығына тоқталып, болашаққа нық қадам жасау үшін қажетті бағыт-бағдар ұсынды.

Оқушылар өздерін қызықтырған сұрақтарын қойып, мамандардан пайдалы кеңестер алды.

Бүгінгі шәкірт - ертеңгі болашақ. Сондықтан олардың бүгінгі мен келешегі бәрімізді де алаңдатары сөзсіз. Маман иелері айтқан ақыл-кеңестері оқушыларға үлкен ой салып, болашақта қалар мамандықтарын қателеспей табуына көп түрткі болады деп директордың бейін бойынша оқыту жөніндегі орынбасары М.Әбенова кездесуге келген мамандарға ризашылығын айтып, алғысын білдірді.

Мақсаты: Мамандық таңдау кезінде оқушыларға бағыт бағдар беріп, таңдау мүмкіндіктерін шешу. Адам өмірінде мамандықтың алатын орны, маңызы туралы түсінік қалыптастыру.